1 da november 2025, 10:30 – 11:00, Dis da litterartura, Postremise Cuira
Primaudiziun da la nova performance da Flurina Badel, victura dal Premi grischun da litteratura 2025. Sa basond sin ‹La müdada› da Cla Biert creescha ella cun la metoda da la blackout poetry – ina furma creativa da poesia, nua ch’in text existent vegn surmalegià cun nair, uschia ch’i restan be singuls pleds – in nov text.
«’Blackout Biert› es ün’avischinaziun naïva al text ‹La müdada›. Our da quist textun enorm condensescha singuls ritems, tuns, pleds e purtrets e creesch üna poesia performativa. Quista poesia viva d’elemaints surreals e giova cun il sömgiar i’l roman da Cla Biert e l’influenza dal subconsciaint sül:las protagonist:as. Sco situaziun da partenza am serva la definiziun da „blackout“ per üna „Gedächtnislücke“ e quai impustüt in connex cun sömmis: il mumaint la bunura bod, cur cha no ans sdasdain ed ans regordain be amo cuort ed ouravant tuot vi dal sentimaint cha no vain gnü i’l sömmi, forsa ans vegn adimmaint amo ün purtret vag, forsa alch dit – tuot tschai es davent, resta ün dubi, es blackedout. ‹Blackout Biert› es ün pa sco sch’eu vess insömgià l’intera ‹La müdada› dürant üna not e partiss uossa quai chi’m es restà da quist sömmi cul public.»